काठमाडौं । उपप्रधान एवं भौतिक पूर्वाधार तथा यातायातमन्त्री रघुवीर महासेठले सरकार र निजी क्षेत्रको बीचमा सहकार्य नभएसम्म आर्थिक क्षेत्रमा फड्को मार्न नसकिने बताएका छन् । शनिबार काठमाडौंमा आयोजित नेपाल तयारी पोसाक उद्योग संघको २९औँ वार्षिक साधारणसभामा उनले यस्तो बताएका हुन् ।

निजी क्षेत्र र सरकार दुवै पक्ष मिलेर देश बनाउनुपर्ने उनले उल्लेख गरे । “...देश बनाउने जिम्मा निजी क्षेत्रको मात्रै होइन, नेपाल सरकारको पनि हो । जबसम्म नेपाल सरकार र निजी क्षेत्रको बीचमा एउटा सहकार्य हुँदैन, आर्थिक क्षेत्रमा हामी फड्को मार्न सक्दैनौँ,” उनले भने, “निजी क्षेत्र मात्रै म अघि बढ्छु भनेर उहाँहरू सक्नु हुन्न । सरकारले निजी क्षेत्रलाई बाइपास गरेर जान्छु भन्यो भने पनि सफल हुँदैन ।”

उनले नेपालको आर्थिक वृद्धिदर ७.१ बाट झरेर अहिले दुई प्रतिशतभन्दा तल आएको बताए । नेकपा (एमाले)का अध्यक्ष केपी शर्मा ओली प्रधानमन्त्री रहँदा नेपालको आर्थिक वृद्धिदर ७.१ प्रतिशत रहेको उनको भनाइ थियो ।

“अहिलेको पोजिसन हेर्ने हो भने नेपालको आर्थिक वृद्धिदर ७.१ बाट झरेर दुईभन्दा मुनि छ । त्यो अब एकदुई महिनापछि सार्वजनिक गर्ने नै छौँ,” उनले भने ।

अर्थतन्त्र सबल बनाउन सबै राजनीतिक दलको भूमिका महत्त्वपूर्ण रहेको उनले बताए । उनले अबका दिनमा अर्थतन्त्र थप सुधार हुँदै जाने जिकिर गरे ।

उपप्रधानमन्त्री महासेठले नेपालले तयारी पोसाकमा धेरै ठूलो परिवर्तन गर्न सक्ने बताए । न्युज एजेन्सी नेपाल