जनकपुरधाम । मधेस प्रदेशमा नयाँ मुख्यमन्त्री नियुक्त भएको १० दिन बितिसकेको छ । मुख्यमन्त्री सरोजकुमार यादवसँगै तीन मन्त्रीले शपथ लिएको पनि एक साताभन्दा बढी भइसक्यो । तर, सरकारले अझै पूर्णता पाएको छैन । शपथग्रहण गरेका मन्त्रीहरूको समेत विभाग तोकिएको छैन ।

मुख्यमन्त्री यादव प्रदेशसभाबाट विश्वासको मत पाएसँगै मन्त्रिपरिषद् विस्तारका विषयमा छलफल गर्न काठमाडौं पुगेका छन् । जनता समाजवादी पार्टी (जसपा)का अध्यक्ष उपेन्द्र यादव र मधेसका मुख्यमन्त्री यादवबीच शनिबार काठमाडौंमा भेटवार्ता भएको छ ।

जसपाप्रति संघीय सरकारको दृष्टिकोण प्रस्ट भएपछि मात्र मधेस सरकारले पूर्णता पाउने बताइएको छ । “केन्द्र सरकारमा जसपाको सहभागिता र सहमतिलाई कुरिएको छ,” सो पार्टीका एक प्रदेश सांसदले भने, “मधेस प्रदेश सरकारको विस्तारमा अझै केही समय लाग्न सक्छ ।”

मधेसमा १० मन्त्रालय छन् । मुख्यमन्त्रीबाहेक थप तीन मन्त्रालय पाउनुपर्ने जसपाको अडान छ । नेकपा (एमाले) र जनमत पार्टीले तीन/तीन मन्त्रालयमा दाबी गरिरहेका छन् । नेकपा (माओवादी केन्द्र)ले दुई मन्त्रालय मागेको छ ।

लोकतान्त्रिक समाजवादी पार्टी (लोसपा)ले पनि सरकारलाई समर्थन र विश्वासको मत दिएको छ । लोसपाले एक मन्त्रालयको नेतृत्व पाउने सम्भावना छ ।

माओवादी केन्द्र मधेस प्रदेश संसदीय दलका नेता भरतप्रसाद साहले प्रदेशका नेताहरूबीच सहमति हुन नसकेको बताए । सत्तासाझेदार दलहरूले अडान कायमै राख्दा सहमति हुन नसकेको बताइएको छ ।

“सत्तासाझेदारको मुख्य चार दलका एक/एकजना मन्त्री मुख्यमन्त्रीसँगै शपथग्रहण गर्ने कार्यक्रम थियो,” उनले भने, “तर, दलहरूबीच सहमति नभएपछि हामीले शपथग्रहण गरेनौँ ।”

सरकारको नेतृत्व गरिरहेको जसपा माओवादी केन्द्रलाई एउटा मात्र मन्त्रालय दिने मनस्थितिमा छ । तर, माओवादी दुई मन्त्रालय पाउनुपर्ने अडानमा अडिग छ । सोही कारण माओवादी केन्द्रीय नेताहरूको निर्णयको पर्खाइमा छ ।

अहिलेसम्म जसपाका सञ्जय यादव, एमालेका सरोज यादव र जनमत पार्टीका वसन्त कुशवाहाले मात्र मधेसको मन्त्रीका रूपमा शपथ लिएका छन् । उनीहरूको पनि विभाग तोकिएको छैन ।

स्रोतका अनुसार शपथग्रहण गरिसकेका एमालेका सरोजले भौतिक पूर्वाधार तथा विकास मन्त्रालय, जनमतका कुशवाहाले कृषि र जसपाका सञ्जयले अर्थ मन्त्रालयको जिम्मेवारी पाउने सम्भावना छ । उनीहरू अहिले मधेस भवनमा सोही मन्त्रालयको निवासमा बसिरहेका छन् ।